lawa toki pi toki pona
toki a! mi waso Kanse, mi sitelen e lawa toki pi toki pona kepeken toki pona taso.
tenpo pini la, mi sitelen e lipu ni. mi wile e ni: jan li sona e ni "toki pona li lili, taso li ken suli".
nasin lipu
kalama
toki pona li jo e lili kalama pi luka luka tu tu (14).
lili kalama pi toki pona li ken sitelen kepeken sitelen Lasina ni: a, e, i, j, k, l, m, n, o, p, s, t, u w.
kalama wawa li kalama suli, li lon kalama open nimi, sama ni: nimi "toki" la, kalama wawa li lon kalama "to".
nimi wan
nimi wan li nimi pi ijo wan, sama ni: jan Sonja, ma Antasika, toki Lasina, ante mute.
jan li kepeken nimi wan la, sitelen open pi nimi wan li suli, jan o kepeken nimi lon lon open, sama nimi ni: jan, ma, toki, ante mute.
tawa pali pi nimi wan la, jan li wan e lili kalama mute, e kalama kalama e kalama uta.
kalama kalama en kalama uta li lili kalama. kalama uta poka kalama kalama li pali e kalama, sama ni: kalama uta "j" en kalama kalama "a" en kalama uta "n" li pali e kalama "jan".
sitelen Lasina pi toki pona la, kalama "a, e, i, o, u" li kalama kalama, kalama "j, k, l, m, n, p, s, t, w" li kalama uta.
lawa pi pali kalama li ni:
- nasin taso pi pali kalama li kalama uta poka kalama kalama poka kalama uta "n".
- kalama uta "n" lon pini li ken lon ala.
- open nimi la, kalama uta li ken lon ala.
- kalama uta kama pi kalama ni li kalama uta "n" anu kalama uta "m" la, kalama uta "n" lon pini pi kalama ni li ken ala lon.
- kalama "wu, wo, ji ,ti" li ken ala lon.
nimi namako
nimi lon li pali lon. nimi namako li namako e nimi lon. nimi lon poka nimi namako li kulupu nimi.
nimi namako li lon kama pi nimi lon. kulupu nimi "jan pona" la, nimi "jan" li nimi lon, nimi "pona" li nimi namako pi nimi "jan".
kin la, nimi namako li ken namako e nimi pali sama nimi lon kin.
nimi "pi"
nimi "pi" li wan e kulupu nimi mute.
kepeken nimi "pi" ala la, nimi namako sin li namako e kulupu nimi ale, sama ni: kulupu nimi "jan pona mute" la, nimi "mute" li namako e kulupu nimi "jan pona".
kepeken nimi "pi" la, kulupu nimi sin li namako e nimi pini anu kulupu nimi pini. sama ni: kulupu nimi "jan pi pona mute" la, kulupu nimi "pona mute" li namako e nimi "jan".
nanpa
toki pona li jo e nimi nanpa pi luka wan (6):
- ala: 0
- wan: 1
- tu: 2
- luka: 5
- mute: 20 anu suli tan 3
- ale: 100 anu ale
jan li toki e nanpa la, nanpa suli li lon open, nanpa lili li lon kama, nanpa ni ale li kama wan.
ni li sama ni:
- tu wan li 3.
- mute mute tu li 42.
- ale mute li 120.
nasin toki
nasin anpa la, kulupu nimi en toki lili li ken kama nimi lon anu nimi namako kin.
nimi lon li nimi lon
nasin toki ni li toki e ni: nimi lon tu li ijo sama.
nasin ni la nimi "li" li kipisi e nimi lon tu sama.
ni li sama toki ni:
- laso li kule.
- kala li moku.
- moku ni li kili suwi.
nimi lon li nimi namako
nasin toki ni la, nimi namako li namako e nimi lon.
nasin ni la, nimi "li" li kipisi e nimi lon e nimi namako.
ni li sama toki ni:
- soweli li suli.
- pipi li lili.
- jan mute li pona mute.
nimi lon li nimi pali
nasin toki ni li toki e ni: nimi lon li pali seme.
nasin ni la, nimi "li" li kipisi e nimi lon e nimi pali.
ni li sama toki ni:
- jan li lape.
- soweli li moku.
- kala li tawa.
nimi lon li nimi pali e nimi lon
nasin toki ni li toki e ni: nimi lon open li pali seme e nimi lon pini. nimi lon open li nimi lon pali, nimi lon pini li nimi lon jo.
nimi lon pali li pali e nimi lon jo, nimi lon jo li jo e pali tan nimi lon pali.
nasin ni la, nimi "li" li kipisi e nimi lon pali e nimi pali, nimi "e" li kipisi e nimi pali e nimi lon jo.
ni li sama toki ni:
- waso li alasa e pipi.
- pipi li moku e kasi.
- jan ni li olin mute e jan ante.
toki namako la toki lon
toki namako li namako e toki lon li toki e ni: seme la toki li lon.
nimi "la" li kipisi e toki namako e toki lon. toki lon pini pi nimi "la" li toki namako, toki lon kama pi nimi "la" li toki lon.
ni li sama toki ni:
- tenpo pini la mi moku.
- tomo mi la mi lape.
- jan li pona la kulupu li pona.
nimi "li" mute en nimi "e" mute
toki li kepeken nimi "li" mute la, nimi kama pi nimi "li" li jo e nimi lon pali sama.
ni li sama ni: toki "jan li moku li tawa" la, nimi pali "moku" en nimi pali "tawa" li jo sama e nimi lon pali "jan".
toki li kepeken nimi "e" mute la, nimi lon jo kama li jo e nimi pali sama e nimi lon pali sama.
ni li sama ni: toki "jan li moku e kili e telo" la, nimi lon jo "kili" en nimi lon jo "telo" li jo sama e nimi pali "moku" e nimi lon pali "jan".
mi en sina
nimi "mi" taso anu nimi "sina" taso li nimi lon pali la, nimi "li" kama li lon ala, taso nimi "li" mute li lon.
ni li sama toki ni:
- mi pona.
- sina suli.
- mi moku, li pona.
toki wile
toki wile li toki e ni: jan toki li wile e kama ni. toki e toki wile la, jan li kepeken nimi "o" tan nimi "li".
nimi "mi" taso anu nimi "sina" taso li nimi lon open la, nimi "o" li lon, sama nimi "li" ala.
ni li sama toki ni:
- sina o pona.
- mi mute o moku.
- jan ale o pilin pona.
toki alasa
toki alasa pi ala anu lon la, nimi "ala" li lon kama pi nimi alasa, nimi alasa ante sama li lon kama pi nimi "ala".
toki alasa ante la, jan li kepeken e nimi "seme".
ni li sama toki ni:
- sina moku ala moku?
- ona li moku e seme?
- jan seme li lon?
nimi pali namako
nimi pali namako li nimi pali kin, li lon pini pi nimi pali kama, li namako e nimi pali kama.
nimi ni li nimi pali namako: wile, alasa, awen, kama, ken, lukin, sona.
ni li sama toki ni:
- jan li ken toki.
- soweli li sona alasa e moku.
- pipi lili li wile alasa e kasi suli.
toki lili
toki lili li toki sama nimi.
toki e toki lili la, jan li toki open e nimi "ni", li toki kama e toki lili kepeken "" (te ... to) anu :.
ni li sama toki ni:
- mi pilin e ni: moku li pona.
- sona ni "mi pona la jan li pona" li pona.
- jan mute li pilin e ni: "jan li toki e toki lili mute" li ike.
nimi mu
nimi "taso"
nimi "taso" li lon open toki la, ona li toki e ni: tan toki pini la, toki kama o lon ala, taso ona li lon. kin la, ona li ken toki e ni: toki kama li sama ala e toki pini.
ni li sama toki ni:
- mi wile lape, taso mi ken ala lape.
- pipi li wile kama suli, taso ona li ken ala kama suli.
- soweli li suli, taso waso li lili.
nimi "kin"
nimi "kin" li lon pini toki, li toki e ni: nimi lon pali li lon li pali sama ante.
ni li sama toki ni:
- jan ante li moku, mi moku kin.
- soweli li lon ma, jan li lon ma kin.
- sina olin e mi, mi olin e sina kin.
nimi kipisi
nimi "en"
nimi "en" li wan e nimi lon pali mute taso.
ni li sama toki ni:
- mi en sina li musi.
- jan en soweli li moku.
- pipi en waso li lili.
nimi "anu"
nimi "anu" li toki e ni: nimi lon ni li ken lon, nimi lon ante li ken lon kin.
ni li sama toki ni:
- sina pilin pona anu ike?
- mi anu jan ante li pali.
- jan li wile e moku anu telo.
nimi kipisi namako
nimi kipisi namako li namako e toki anu nimi lon lon pini, kepeken nimi lon kama.
nimi ni li nimi kipisi namako: kepeken, lon, sama, tan, tawa.
nimi kipisi namako li namako e toki la, ona li sama toki ni:
- jan li lon tan pona.
- mi moku kepeken ilo moku.
- ona li lape lon tomo.
nimi kipisi namako li namako e nimi lon la, ona li sama toki ni:
- mi moku e kala tan ma telo.
- jan lon tomo li jan pona mi.
- jan wan li lukin e jan sama ona.
pini
ni li ale. jan ale en toki pona o pona!